معدش ف قلبي غير عروة وسطرين الكتاب باعهم هاتولي م البشر انسان هاتولي ايمان كما السنه هاتولي قلوب تهد الطوب على سجني معنتش قادر استنى وهاتوا الصبر لو يجني حصاد الأه بلاش ف القطن صبغة يود مدام جرحي اتقفل بتراب بلاش محلول مدام جسمي مفيهش وريد هاتولي م العنب عناقيد هاتولي الساقية لو ينفع تفكرني براس الغيط هاتولي الدار بلمتها هاتولي الصحبة من غربة سنين بتفوت هاتولي الراكية والعنبة هاتولي السبحة والنبوت كفاية القطر بيعدي وبينزل بشر تردم جحور وشقوق مفيش ف الردم غير عفرة وصوت مخنوق قضيب القطر طال ليله ف حضن البيت وانا والليل بقينا اصحاب هاتولي الأوكرة لو صاحية تسك الباب انا استكفيت هاتولي زمان يفكرني إن انا انسان ومش م الجان ولا درويش بيلبس عمة ويفقر مع المداح هاتولي زمان عشان ارتاح وخلوا الست لو صاحية بلاش تندب على الرجعة ماانا عارف سنين العمر مش راجعة لكن زكري اللي فات دايما تونسني تحسسني أن انا عايش وعضبي فولاذ مهوش بايش ومش عيل بلع عروة زرار مقطوع وبيدور على الإبرة حبال الصوت بتنهج من أنين الوحدة والتفكير مفيش نبرة حصان العمر بيعدي ومفيش عبرة وتربة تراب وقفل وباب ومات الشيخ ومات الشاب وعربون الزمن مدفوع مفيهش رجوع بشر كداب هاتولي حصيرة الحاجة انام واحلم ف فرشتها زمان كنا وكنا زمان بنكتب ف السهر اشعار وكنا كتار مفيش كلفة مدام الألفة حضنانا بنصبح ف النهار نزرع وييجي الليل يكمرنا ف دفا التنهيد ننام من غير هموم وديون ونصحى نسابق القطرات نلم الضحك م الخطوات هاتولي بنات كما بنت العرق زانها وزينها ولو ف الوزن تتاقل مفيش راجل هايوزنها مفيش بوية على وش مطيبه ربه مفيش بودرة على الضحكة اللي بتسافر تلم الفرح م النوات هاتولي صيام كما كنا نصوم رمضان هاتولي فانوس من الدكان مفيهش الكهربا والصوت فانوسي كان بلا لمبة دي كات شمعة وبرواز صاج وبابه إزاز تقيد الشمعة من شمعة وصوت البمب بيجلجل مع التراويح هاتولي العيد بتاع امي اللي كات تصحى بنور صوتها على ودني صباح الخير قوم الحق قول مع التكبير هدومي قماش وكان كاستور وساترني ومصروفي ريال لكن كما الجنيهات هاتولي اصحابي من قبل الصحاب ماتخون هاتولي ناس متعرفشي عن التليفون هاتولي ناس تصون السر ماتزيعهوش هاتولي ناس تصون العيش ماتنكرهوش هاتولي كتف من عهد الكتاف والشيل كما كتفك ياابويا شال هاتولي احمال كما حمل الصحاب ف الغيط ابويا كان جدع ويصون لكنه حويط وقالي ف يوم ف حضن الدردشة بالليل صون كلام لاصحاب وخدلك م البشر عزوة ولف بلاد وصاحب ناس وخلي الزاد يقين بالله بلاش تجري على اللقمة اللي مش لايقة على بطنك ولا تقعد وتستني الطعام يأتى وخد من كل البلاد صحبة وعاشر م البشر الوان وهايصادف تلاقي لون شبه لونك ووزع ف الجيوب منابات ولف الصبح ع اللخوات ووزع خير يجيك الخير ولم الصهد من شمس النهار تنفع في ليل امشير بلاش ترمي جتتك ع الناس ف افراحهم وخلي الرمية ف الأحزان بلاش تجري لمطارحهم مدام بابهم مهوش مفتوح وخاف م اللي نكر خيرك وهاب اللي الأصول داره وعيش راجل بلا عجلة على امرك ورزقك جاي بلا استعجال وشيل عن كل من أنت كتافه الشيل وزور كل اللي مازارك وصون جارك كما رحمك هاييجي اليوم اللي يشبهلك ويشهدلك صفا النية وتصعد روحك السموات وتلقى الطوبة مبنية فاربك ادرى بالنيات
