مِلاح
بتضحك و قلبَك بينزف ضمير
و حالَك مُحالَك و ربك كبير
و دمعك مدامعَك و شمعَك ضلام
و نارَك مدَارَك و دارَك سرير
بتضحك و روحَك مراوِح تراب
بتحدِف هوايل و ترمي الهِباب
شبابَك مشابِك و شَعرَك دا شاب
و شابِك في عمرَك جراح لسه غير
بلاش تبكي ضحكه بلاش تبقى نوح
بلاش تبقى سكه لكل اللي راح
وجودَك أمانَك… أمانَك عيون
عيونها الضفاير غداير مِلاح
يا صوتها اللي داير دواير بحور
و لحن الحبايب إشارة مرور
و شمسي و دوايا و قمري و هوايا
و حلمي اللي عاشقُه يا جنة و سرور
يا مخلوقة طيني وتيني اللي عاش
يا طعم المحبة يا حضن انتعاش
يا وردة حناني و شطي و أماني
يا كل الأماني في جرحي اللي باش
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
