أخدت الشعر مأوى وبيت
مفيش ولا بيت
قدِر يحوي مشاعري بجد
قلبت هزاري فجأه لجَد
تِعِب قلبي
يداري الدمع في الضحكه
يداري الحُزن في النُكته
واحكي كل أحزاني بسخريه
بضحَك كل خلق الله
أتاري ضحكتي عليا
حتى الشعر فاض بيا
يقول ناقد أنا باحكي
ومفيش في قصيدتي معنى جميل
ولا قافيه
اخدنا إيه من التجميل وم الآفْيْهْ
لا نافعه في شِعر ولا نُكته
بكتب والحياه باهته، على كلامي ببهتانها
بكتب ايه؟ وبكتب ليه؟ مانيش عارفه!
يمكن بواقي حروف حبيت أشكِلها ومركنهاش
يمكن لإن الخوف من إن حتى الشعر مبيبقاش
بعد اما كانلي بديل للفضفضه
وللطبطبة
ولكل شئ.. لكن
مليت خلاص من دمعي الساكن
مش هلغي تاني الدمعه بالكلمة
والفضفضه بشِعري
هبكي لحد ما ينتهي دَمعي
كل القصايد ليه بتنزف دَمع؟
معقول معُدتش فيا غير ألمي!
معقول محسش بيا غير قلمي!
قلمي اللي فوته كتير وممسكتوش
شِعري اللي فوته زمان ومكتبتوش
من بعد ما كان مستعصي البوح
والحبر مبيحَنيش ورقي
عاد تاني يوصف في مشاعري
وأنا لما بيبكي ع الورق قلمي
بيقِر ساعتها إن الوجع فاض من قلبي
والحزن اتسرسب في عروقي..
ف اتصاب بالعيا روحي وجسدي
ومعادليش طاقة اني اقاوم،
بستسلم وبسلم روحي
والنبض ضعيف ف انا مش عايزاه
علشان بيزود في جروحي
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
