هي العيون وخداني
ورايحة بيا لفين؟
يا ام الجمال رباني
والورد ع الخدين
خايف ف يوم تنسيني
والجرح يبقى اتنين
وأرجع أقول يا سنيني
هو الحنان….. راح فين؟
لا انا قلبي حمل جراح
وللا عيني حمل دموع
فسيبيني أعيش مرتاح
وبلاش أعيش مخدوع
زمن المحبة ..أهو راح
والنبض ..مش مسموع
والمشي…. ف الممنوع
هيخلي قلبي حزين
أهدى عليا أمال
وبلاش كلام معسول
د انا حالي أصبح حال
ودموع عيوني سيول
لا انا حمل أعيش رحال
ولا حمل أبات مشغول
والقلب م الأهوال
بيواسي دمع العين
فان كان ده حب صحيح
وهواكى نبقى أحباب
وبتطلبي التصريح
من قلب مش كداب
حبيني زي ما أكون
ولا تفتحيش الباب
لظنون وراها ظنون
بتفرق الحبيبين
بتغرقيني ليه
في حسنك الفتان؟
وبتحرمينى ليه
من كاسك المليان؟
وانا اللي طول الليل
جنب القمر سهران
وبغني ع الألحان
للورد والياسمين
*************************
رضا أبو الغيط
