“”قول يا قلم”” كلمات / محمود وحيد
مالية بسمومها الكاس
وتقولى إهوانى
أصل الهوى احســـاس
أما الجسد فانى
********************
فانى يا ابن الطين
لابد يوم هتموت
اعرف حقيقتك فين
قبل العمر ما يفوت
*******************
ما يفوت غير اللى تاه
وبصيرته معتوهه
واللى شيطانه غواه
وبيعشق التوهه
****************
التوهه توهة قلب
الدق فيه مجروح
غاوى يضل الدرب
واخد معاه الروح
*****************
والروح تروح ما تروح
اهى بردو مغلوبة
على نفسها بتنوح
والدمعة مطلوبة
******************
مطلوبة دقة قلب
متعطرة بشوقها
بتغنى غنوة حب
وتنادى معشوقها
*******************
معشوقها شمس نهار
ذى النسيم فى ربيع
بيداعب الأوتــار
جواه هواه ما يضيع
******************
مواضيع على مواضيع
وحكاية فى حكايـــة
يالله هوى للبيـــــــع
مين فيكوا ويايــــــــا
*****************
ويايا صدق الحب
مين يشترى منى
اللى غاوينى يقب
ويشيلنى فى النينى
*****************
النينى فيه اسرار
مش بس ضى العين
فيه البعيد يحتار
ويلوم على العاشقين
******************
يا عاشقين الــروح
انا روحى مش فيا
خدها وفاتلى جروح
والرك ع النيـــــــــة
*******************
النية نية خيـــــــــر
والخير دبل عـــوده
بكى بكانا الطيـــــر
غنانا على عــــوده
*****************
عوده اللى كان مفرود
طارح سنابل ضى
دلوقتى بقى مــرفوض
ميت ونبضه حى
*****************
حى اللى قلبه ما باع
ولعزته صـــــــــاين
شبعان ولو يوم جــــاع
ما يصاحب الخاين
*****************
الخاين اللى يخون
فى السر من صانه
والارض ليه بتهون
عاشق لخوانـــــــه
*******************
خوانة نفس الخبيث
بتسمم الأبـــــــدان
جواها 100ابليـــس
وبتزرع الاحــــــزان
*******************
احزان ولادنا كتيــــــر
والتوهه واخداهم
من حفرة رايحين بير
والضلمة ضماهم
*******************
الضلمة ضلمة عقــــل
وضمير ما بيخافشى
وميزان ما يعرف عدل
اعمى ما بيشوفشى
******************
ما يشوفشى م الغربال
غير اللى ماله ضمير
واللى قطع الأوصــــــــال
وبيعشق التدميــــــر
*******************
تدمير نا هو مراد
اللى بيرصدنـــــــــا
بيمول الأوغــــــاد
وبيدنا يبيدنــــــــــا
******************
يبيدنا لاجل ينــــــــــــول
حلمه اللى ليه عايش
ما هو أصله مش معقول
يبقى العيار طابش
*****************
طايش يا قلب الولد
مش فاهم اللعبة
اللعبة لعبة بلـــــد
عفريتها فى العلبة
******************
والعلبة فى ايد شياطين
راصدين خطاوينــــــــــا
وبيدفعوا ملاييــــــــــــن
وبيهدموا فينــــــــــــــــا
*******************
فينا الغلط يا ناااااااااس
والحل بايدينــــــــــا
لو يطهر الإحســــاس
هنعود أكيد لينا
محمود محمد وحيد كامل
المنيا …مغاغة ….قفادة
