ما تسأليش..خاص بمسابقة العامية..للشاعر / منتصر منصور

خاص للمسابقة..

عامية..

…

ما تسأليش..

,.,.,.,.,.,.

لجلِك أنا بعت أهل الأرض..

أيوه بعتهم..

لما التقيت الغدر

بيجري ف دمهم..

لما التقيت الفكر ..

سادي ف عقلهم..

الكلمة كات بينهم فحيح..

بترج ف البدن النحيف..

بين الشفايف ليها شكل

وليها صوت

غير اللي جوه قلبهم

يا لعبهم ..

يا كدبهم على بعضهم..

الحب بينهم طفل خايف م الضياع..

واقف بيبكي غربتة..زي اليتيم..

مين هيه أمه..؟

مين يضمة..؟

فين أبوه..؟

فين هما أهلة اللي فاتوه..؟

والأسئلة م بتنتهيش..

عشان كدة ..

ما تدوريش..

ما تسأليش..

وما تخافيش..

سلمتلك خيط الأمان ..

ونزلت ف بحرك زمان

من غيرك أنت إزاي أعيش..

أنا وسط موجك..

في بحارك ..

بين محارك..

حسيت بعمري

اللي انتهى راجع..

وتاني الحياة

راح تترسم فوق الحيطان

بسمة تتجدد يوماتي..

يا حياتي..

وتقوليلي تاني..

أرجع ويا بشر الأرض ليه؟

بعد ما التقيت الحب ف عيونك..

والتقيت الأمن بين ضلوعك..

خاتم سليمان..

اللي ضاع من أمير الجان ..

زمان..

يا مدينتي بين صوابعك..

أطلب الحب التقيه..

بين قلوب زي الحجارة..

أطلب الإخلاص ..

أشوفه ف دنيا مليانة مرارة

إيه راح أطلب ولا إيه..؟

كل اللي ملكي في بحورك..

لكن على الأرض الكئيبة..

بين البشر الثقيلة ..

ماليش ..ماليش..

مش قولتلك..

ما تدوريش..

عن سر حبك..

ما تسأليش..

وما تخافيش..

سلمتلك خيط الأمان..

وأنا جوه بحرك من زمان..

ولو طلعت البر تاني..

إزاي أعيش..

إزاي أعيش..

….