خاص بالمسابقة
سيناريو وحوار
جزء من سهرة درامية
يحيي أحمد محمود
شهرة / يحيي أبوعرندس
ت /01226178668
رئيس جمعية رواد ثقافة أمل دنقل
عضو نادي أدب أمل دنقل بقفط ..قنا
تدور أحداث السهرة عن مدحت الموظف في مصلحة حكومية لايكفي راتبه الشهري مصاريف بيته وأسرته نتيجة أقساط كثيرة ويواجه متاعب وصعاب يومية في الحياة ,زملائه في المصلحة يعرضون عليه عمل جمعية معهم لكنه يرفض لعدم سداد قسط الجمعية الذي يؤثر على المرتب .وفي إحدى الأيام تزورهم في البيت صديقة زوجته التي تطلب منها وتعرض علىها أن يعمل زوجها معها في المصنع ويدير حساباته ويكتشف بعدها بالصدفة ملف وبداخله مستندات تثبت ملكية المصنع للسيدة مروة بنت زوجها وأيضا العقارات والأراضي ملكا لوالدتها ,ويهددها بكشف مخططها للبوليس وأن ترد الممتلكات لها ,وتحاول أن تقدم له رشوة من المال و تعينه رئيس مجلس ادارة المصنع وتعرض عليه زواجها منه ثمن سكوته ,يظل مترددا مابين عذاب الضمير والسكوت عن الحق ,ويقرر أخيرا تسليم الملف إلى إبنته صاحب المصنع ويقف معها ومع زوجها حتى تسترد حقها , وأثناء عودة سمية هانم تصطدم سيارتها بسيارة نقل تنقل إلى المستشفى وتصاب بكسور في العمود الفقري يؤدي بها إلى العجز الكامل وتشويه وتشوهات بوجهها ,ثم تصاب بأزمة نفسية ويقرر الطبيب إيداعها مستشفى الأمراض العقلية ,وتقرر مروة قبل سفرها إلى الخارج إسناد إدارة المصنع وإدارة باقي ممتلكاتها إلى مدحت ويستقيل من وظيتفه الحكومية ويتفرغ للمصنع وينجح في عمل شركة صغيرة للتصديربجانب إدارته للمصنع ويعيش حياة سعيدة مع أسرته بلا صعاب ولامتاعب .
——————————————-
نهار خارجي
مشهد 1
المكان : طريق عام ..صوت سيارات
مدحت يسير وحيدا في الشارع
(مدحت 35سنة ) شاب وسيم طويل قمحاوي اللون
حاصل على بكالوريوس تجارة شعبة محاسبة
مدحت : (يتحدث إلى نفسه )
أعمل إيه بأه مرتب ضعيف ..مصاريف البيت والأولاد تزيد يوم
بعد يوم
هو أنا أجيب من فين فلوس .. المرتب على كد حاله
أروح أسرق ولا أختلس ولا أعمل إيه
كويس الشارع مافي حد غيري ..كانت الناس قالت أنه جننت وباكلم
نفسي .. الحياة بقيت صعبة ..غلاء ..ودروس ..وفواتير بتدفع كل يوم
أعمل إيه المشكلة في الفلوس لو الراتب
كبير ومافيش خصومات كنت بقيت ملك … عدم الفلوس ..الفقر
فعلا صدق الأمام علي لما قال ’لوكان الفقر رجلا لقتلته ’ أقتله
وأشرب من دمه كمان .. شكل الدنيا هتمطر …المطر ابتدا يزيد
بيقولوا المطر خير ..(يضحك في نفسه )
إيه يامدحت عايزة تمطر فلوس ولامرجان …سيدنا عمر قال
السماء لاتمطر ذهبا ولافضة ’
لا …الماء بدأ يزيد … كويس أنه في كشك جنبنا هنا أشتري الجرنال
المساء ويمكن يكون فيه زيادة في المرتبات وينفعني من المطر
نرجع البيت وبعدها يحلها ربنا من عنده
قطع
ليل داخلي
مشهد 2
المكان :منزل مدحت
إحسان زوجته تتحدث إلى طفلتها الصغيرة
إحسان (30سنة ) جميلة ..بيضاء اللون
حاصلة على معهد فني تجاري
إحسان : (تتحدث إلى بنتها الصعيرة)
يابنتي اتهدي ونامي ..هتقعدي على كتفي كتير كده
خليت ليكي التلفزيون وولعت لمبة الكهربا الصعيرة
قلت يمكن تنامي عايزة تقعدي صاحية ومفتحة
عينك ..يلا حبيبتي ملك نامي …ملك حلوة وهتنام
قطع
نهار داخلي
مشهد 3
مصلحة حكومية
مدحت يتحدث إلى زملائه داخل مكتبه
شوقي وفتحي ..الساعي يقدم لهم الإفطار والشاي
الساعي : نظفت لك المكتب يا أستاذ / شوقي
شوقي : بعد ماتخلص نظافة مكتب مدحت وفتحي حضر الشاي
فتحي : خد هات لينا الفطار الأول
الساعي : من عيني يا بشوات ..أعمل حساب الأستاذ مدحت
فتحي : هات ليه طبعا ..أنت فاكره صايم النهاردة ولا إيه ..؟
الساعي : طيران ياباشا
شوقي : يمكن يكون عليه ندر
فتحي : (بضحك )
ماترد ياعم مدحت ..سرحان فين ..؟
مدحت : أنتم رايقين أوي وأنا مش طايق الدنيا حتى .. وأنت
ياعم شوقي فاضي ولاعندك مشاكل ولاهموم
فتحي : (بضحك )
ها ..ها ..ها فعلا والله يامدحت ووارث عن والده عمارات
ومحلات يبقى يشيل الهم من فين
شوقي : (بغيظ )
قروا بأه علينا لغاية ماتجيبونا الأرض
قطع
نهار داخلي
مشهد 4
المكان : مصنع السلام للخردة
سمية (41)سنة جميلة ..شقراء
ممشوقة القوام ..مبتسمة
تتحدث إلى السكرتيرة
سمية : بلغت العمال أنه في اجتماع دلوقتي
السكرتيرة : بلغتهم يافندم ..تأمري بشئ تاني سمية هانم
سمية : أبعتيلي السواق هنا
السكرتيرة : حاضر سمية هنا
(تخرج السكرتيرة من المكتب )
سمية : (تكلم نفسها )
الملف ده لازم يفضل بعيد ..ماحدش يشوفها أبدا ..وماينفعش
في البيت ..نفسي أخبيه في مكان أمين ..خليه مؤقت في الخزنة هنا
(تشرد بتفكيرها بعيدا )
هي ديه فعلا ..صديقتي إحسان كانت أعز صديقة وزوجها طيب
جدا وممكن يشتغل معاي ويساعدني ..بعد الإجتماع أعمل ليهم
زيارة ..وأكلمها على مدحت زوجها يشتغل عندي ..أفضل واحد
يمسك حسابات المصنع
(تضغط على سماعة الميكرفون وتتحدث إلى السكرتيرة )
العمال جاهزة ياميمي
السكرتيرة : جاهزين ومنتظرين سعادتك في حجرة الاجتماعات
سمية : أنا جايه ياميمي حالا
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
