منطقة اللاشئ .مسابقة الشعر العامى بقلم / محمد عبداللطيف الخضرى 

خاص بمسابقة همسة
شعر عامى
محمد عبداللطيف الخضرى
(محمد الخضرى)
مصر
01091199085

منطقةْ اللاشئ

إعلي بصوتِك وانبحى
خلِّى الضيا يقلب ظلام
نادى لحبات المطر
تفرش طموحها للعدم
تكتم ف لونها للندم
تحلف يمين للنبته تدفن نفسها
او حتى توءد غُصنها
تحلِب عروقُه تطهره
احسن مايطلع جوه غيط
مليان نَجَس
احنا الحرس
شوفنا المروءه بتندهس
شوفنا الغُبار طالُه العَفَن
والجِدر كان لابس كَفَن
واتمنى كُلٍ مننا
يُحضُن صَنَم
ولا انُّه يبقى كالعدم
او نبتلى بالأبرَهَه
ولا نتنحس
بورده بيضا ف شمسها
زهره وشايفة نفسها
قَلَبَت سواد من جدرها
لو اتبعنا نهجها
نصبَح عُصاه
من شمس زاهيه مُبهِجَه
لنار بتطرح حَملَها
طفل اتخرس
جالك ونس
وعرفت انه من زُقاق
ضيِّق رهيب
بينز ريحه تشمها
تمسِك حيطان الانتحار
وسط الغيوم وِتْفَهَا
تنسى ف لحظه وقتها
انك بتوعى لكل شئ
كاره تبُص لحُضنها
من وقتها شاعر بقئ
حاسس بإنك ابنها
مُغتال ف منطقةْ اللاشئ
باتت معانى الكُحل فيك متهجنة
شارب طواحين العدم
شاكك ف انك ابنها
وهربت قبل ما تنفطم
ومن ساعتها بتنكتم
وبيتبلع مليون لسان
وحتى قبل ما تتقرِص
صابك برص
صُب الندم
ف عروق ومخلِى دمها
فاتحه صدورها للألم
أصل القلم
حالم بسِنُه مَبري فيه
لكنه اول ما اتبَرَا
قاله اتقصِف راح ترسم ايه
حبرَك خلاص طار واتنسى
مرمط معانى البهدله
حزِّم ف وسط مدينة كاملة تهزلُه
قرَّط حزامُه وسَب له
علِّم عيالَك
معنى صوت الأسئلة
واصرخ تفوق
نبض الجدار لو منتهى
روح ادفنه بره الجحور
مش كل مره تهجنه
وتعلمه ضرب الأصول
يرجع على لون العرق
من غير شعور
ويحث فيه الأنصياع
تحت المطر
وينسى فيه لون البحور
واياك ف مره يتقمص
بقلم “محمد الخضرى”