خاص بالمسابقة
إنجي مصباح محمد محمد شرف
( إنجي شرف )
كفر الشيخ . مصر
ت : 01095158776
شعر العامية
من يوم ما مشيت
( النص )
البرد معشش ف ضلوعي
من يوم ما مشيت
سايب تفاصيل مش هنساها
وخصوصا آخر مرة بكيت
كان قبل ما تمشي بيوم واحد
وبكل هدوء ودعت البيت
ولأول مرة ؛
بحس بجد اني اتهديت
الكون مابقاش بيساع خوفي
ولا شوفي بيوصل حد النور
الارض الخضرا صبحت بور
من يوم ما النور ؛
زارك ع الحيط
من يوم ما مشيت
وانا كل جوارحي بتستناك
الناس فارقوك وانا روحي معاك
صورك ويايا ف كل مكان
فكراها بتفاصيل التفاصيل
انا لسة بشوف راسك بتميل
علي كتفي ف عز ماقولت الآه
من يوم ما فارقت البيت واحنا
عجزنا وتاهت ملامحنا
من يوم ما مشيت
واحنا في محنة
والحيط بيعيط جنب امي
والدمع بيحضن خيط كمي
ومابيكفيش
ولأول مرة بنستناك
وانت مابتجيش
ولأول مرة الكون بيضيق
والوقت بطئ ومابيعديش
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
