قصيدة : بعد المسابقات . مسابقة الشعر العامي بقلم / هند محمود علي “هند حسوب”

عمري الساقية : مرهونة سنيني ب جَريّ المَية

لقلب الطين

قلبي النَبنة : يَجهل ف جميع أنواع الدَق

ما يعرف غير دقة خوفةُ و دَقة بتِحْيية

يَجهَل إية شعور دَق التانيين ..

حلمي تقاوي : بَستنى عليها من الغرسة لحد التانية

وخيوط الشمس صديق دايم

وسلاسل صافية من السماوات

بتمِد القلب دَفاة ل سنين ..

إعتاد القلب يكون صامد

مهما الأيام بتغَلِّب فية

وإعتاد البال دة يكون واعي

مهما السنوات بتقَلّب فية

وإعتادت بحُكم العيشة أكون تمثال عايش /

م الصعب ف يوم تقدر تتنية

ف بحجم الكون أنا فيا جمود

صعب يغرَك /

وبحجم الكون أنا فيا شعور /

والأيام سَكِّت بابها علية ..

دَاري مأَمِّن :

مطَمِّن طول م أنا

ساندة حيطانةُ ب إيدي العاج

أصلآ مش هو اللي بيحْميني من الدنيا /

هو اللي إطَمِّن بيا سنين

وبيطَمن كل م يحتاج

الحيط يوميآ بيأيِّل على كتفي ينام

أنا صاحبة وَفيّة ل رُكن الدار

وكتير بَبقالةُ ف كَسرةُ علاج ..

وإنت اللي الأيام لما ف يوم

حَبِّت تِتبَسِّملي ف مرة

ف قابِلتَك صدفة ف قطر بعيد

حَبيتني أنا كيف وبدون مواعيد

وإزاي قلبَك /

من كل بنات حوا الحلوين

شاف فيّا جَمال وب شكل جديد

وإزاي فجأة إتحَوِّل كوني

من أرض و نَبتة و فاس وغيطان

ل مشاتل فرحة وقلب سعيد ..

حَبيتني إزاي ؟

حَبيتني إزاي وإحنا اللي ما بيننّا

ب قَد الناس فوق أعمارهُم ..

بيني وبينَك مسافات أطول من ليل الناس

لما الأحزان يومها تزورهم ..

بيني وبينَك دنيا ومشاوير /

زي البهوات ف أبراج عالية

أو زي المساكين ف جحورهم

بيني وبينَك قد المخاليق مسافات و فروق

أو قد القِلة راحة بال عند خلايق م

بتغيب يوميآ بالأعمار وياكسورهم

وبرغم فروق يامة ما بيننّا

ف لقيت ف وصولَك ليا نجاة

أنا كان الليل اللي ف أيامي يفوق شَمسةُ

بوجودَك عيشت نهار وحياة

وبقيت أفهم كيف الإنسان بيحب إزاي ؟

وإزاي دقّاتي المبسوطة

كان آخر حلم أنا بتمناة ..

وبقيت حابة المسافات جدآ

لو من بَعديها إنت وصولي

مُمتنة لأوجاعي السابقة

و ل صبر سنين كنت بطولي

مُمتنة لقسوة أيامي

ول سقف الدار دة وأحلامي

ولعيشتي ال أنا كنت بَعيشها

كان أكبر فرحتي ، محصولي

والشكر لربي عشان أملي

و للحظة يادوب حققهولي ..