خاص بمسابقة مهرجان همسة
فرع : الشعر العامى
بعنوان : ( 25 … 60 )
بقلمى / أحمد عبد العزيز محمد خليفة
مصر -محافظة القليوبية
…………………………………………………………………
كل اللى حب إتولد .. واللى كره مات
و اللى وصل للعشق ماتحبسوش مسافات
ده بيتكتبله يعيش ..
وكونك وردة مجنونة
وهبها الربيع لخريف عمرى ف لحظة طيش
ودخلتى قلبى على فجأة
وانا المعتاد بقالى كتير على البشويش
ف ده يسمحلك
تصبى عطور ف شرايينى كما تشائي
ويسمحلك
بتغيير روتين العمر المعتاد ف اشيائى
ويسمحلك
بمنح حياة .. للميت ف أوراقى
وكونك راضية بمشاعر مسنودة على عكاز
ف ده إنجاز .. يضاف للباقى ف أيامى
ده لو .. ده لو أيامى لها باقى
أنا لو أيامى ليها باقى
هعيشهالك يا ضى العين
أمور حياتى كلها تبقى سنن
وأنتى لوحدك فرض عين
ما هو مين يصدق ما حصل
قوليلى مين
إنك يا أجمل حلم عمره
يا دوبك 25
واقفة جانبى ف عيد ميلادى
بتطفى الشمعة ال 60
يا كاس شمبانيا متلون بلون ياسمين
بتعملى إيه هنا جنبى
و أنا براندى 84
إزاى الدنيا دى وافقت على لقانا
إزاى خوفو هيتعامل مع آيباد صنع ف الصين
و إزاى أنا هقدر اتحمل
حيرة وقوفى
فوق صراط مشدود ما بين نارين
و أنتى عليا بتنادى
معرفش إيه حببك فيا
و أنا كل ما فيا أقل م العادى
و إزاى رقة كلام قلبك
بقت دانات مدفع
تزلزل قلب كان هادى
و أنا .. راضى
أنا راضى و حبيتك
حبيتك حلم متسكع على ناصية بلاد عواجيز
حبيت أنا كلك بكل ما فيكى بدون تمييز
يا شقية يا غلاباوية يا طقة
يا منظر طبيعى للجنة ع الحيطة
وفجأة قرر يهجر البراويز
و بدون ما يخاف
صبح ندى وأمطار
وصل لقلبى ف عصر جفاف
كل النغم مسموع تملى
وأنتى .. أنتى نغم متشاف
يا أرق نغم الموجى
ف ” كامل الأوصاف ”
ياناى حزين عزف فرحة ف ضلة الصفصاف
عشقتك .. آه عشقتك
لكنى عشقت قبلك العدل والإنصاف
فبقولك إرجعى
صحيح وحدانى
ودخولك على قلبى علمنى إيه معنى الونس
لكنى مش هقبل تعيشى
ف دنيا كل كلامها
متعلم لغة الخرس
والدروشة
وقلب زى دولاب قديم
مليان بواقى مشاعر عجوزة منعكشة
فحرام عليا أسيبك
تشوفى أحلى أيامك
بعيون جفونها مكرمشة
25 مع 60 ماينفعش
ماينفعش أصلى العصر حاضر
مع دخول وقت العشا
