ط
مسابقات همسهمسابقة الشعر

صندوق مقفول..مسابقة شعر العامية للشاعر/ محمد محمود عبد الرؤوف من مصر

خاص بالمسابقة
صندوق مقفول
وشوية عفره بتتحرك
علي باب امبارح بالمقلوب
وان دورت
هـ تلاقي الباقي من النسوان
برفان
رافض يتواجد في الأوضه
علشان ما يموتش من الخنقه
جوه الرأتين

********************

أطفال ….. بتعيط
وشوية حركات مجنونه
من بندول الساعه
بسببها بتجري الارقام بالورب
والصوره المتعلقه ع الحيطه
يتسرسب منها العمر
ساعات
تندم ع العدد الناقص منها
لما مشيتي
وسيبتي الكادر
يموت

شاب عبيط
بيدور علي مدخل لقصيدة
ما فهمتهوش
قصاقيص
منشوره علي الحيطه
بتعافر ويا الفايت منها
وكلام متنطور
بيدور علي كباية عشق
يدوب جواها
ما ترحمهوش
وانا بفتكر
كنا عيل متوزعين
علي كل ناصيه ف سكتك
لما تعدي وتسحبي
كل العيون المحبوسين
جوه القيم
ماهو غصب عني
كنت بتفرج عليكي وبحلمك
وانا بتعصر
لما بصادف زكرياتي
جوه حدوتة صباكي المستحيل
تستلمني
كل شياطين الهوس
تبدا تخطف
حتة التورته اللي انا
خبيتها من اسنان وجع
وما دوقتيهاش
وساعتها
اشم البرفان الميت
علي باب الاوضه
اللي بتسكنني بتفاصيلها
والقاها تهد الباقي معاكي
لما بحاول
افتح حصالتي
واجيبلك من مصروفي
كتاب
اقراكي لوحدي
وانساكي
لما تسافري بره حدود الوان الدم
واشوفك
عمرين بيطيرو
ويا نسيم مجنون
مالهوش في الفاضل فيا
غير الرسم المتخربش
علي طرف بطاقتي الشخصية

القمر
باعت بيسال
ممكن اخرج م القفص ؟
لكنه فاشل بامتياز
مقدرش يكمل وقتها
علشان يشوفك وانتي ماشيه
سابك بدون أي اهتمام
وانتي الوحيدة
واقفه مستنيه يوم القطر ييجي
ويفرمك
وبيرسمك
اسفلت شارع مدرستنا ..
خطوتين
الاولي تهرب مننا
والتانيه تهرب ناحيتك
لو تسمحي
ابقي ارسميني
فوق كتابك
كنز فاضي
يفتكر
احساس شفايفك
ع الحواف
ويقارنه بالجزمه اللي نازله تفرمه
جنب الرصيف

ختام

لو مت … وانا في الغربه
ابقي افتكري
طعم حروفي وهي بتلحس
كل سطورك
وانا بتعلم
امسك قلمي
وادور وياكي عليكي
ما اتلاقيكيش

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى