ط
الشعر والأدب

مغدور بحلمك يا وطن..للشاعر / أحمد الخليفة

أحمد الخليفه

ــــــــــــــــــــــــــــــــــــــــــــــــــــــ

أمايا جايلك بعد فجر بشال حرير

لابس عبايه ولونها أبيض زي قلبك

جايلك وهحضن عمري اللي جنبك

ساعات تقيلة مش عايزة تمشى

راجع لحلمي وأشوف عروستي

والفرح عيد

املي الشوارع عناقيد فرح

قولي لكل الناس ابني عريس

خلاص يا أمي النور طرح

***

وعدى فجر بلون حزين

الدم يكسي هدمتك

وعفار ترابها مغبرك

واسأل عليك

فين شاله الابيض والعباية

فين ضحكتك

***

قالولي قال ولدك شهيد

زفوه ملايكة في توبه الابيض

والعروسه جنة عالية .. مش دنيتك

ابني شهيد؟ .. ما كفاية كدب

طب هو حارب وانتصر؟

كم ألف واحد م العدا قطّع جسومهم؟

هاتوا سلاحه كم طلقة فيه

ابني بطل هزم العدا !!!

***

بصيت لقيت كل الوشوش متحيرة

متغيرة

ابنك شهيد من غير ما حارب مات شهيد

الغدر غول ملوش ملامح م الوشوش متلونة

***

ابني اللي شايل هم بلده اتغدر!!!

ابني اللي حالف ان بكره مهرها !!

دبحه اللي خانك يا وطن

مين كفّنك؟

مين اللي شق في وشي مليون خط دمع؟

لاحلف بدمك يا حبيبي ما ابتسم

غير لما ييجي بكره تاني من جديد

والفجر يطلع يترسم

***

شوف كم شهيد راحوا عشانك يا وطن

شوف كم عروسة ترملت قبل الزفاف

شوف كم ألف ام اتململت فوق التراب

وادي حكايتك يا وطن

مغدور بحلمك من زمن

#الشاعرأحمدالخليفة

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange