لأسباب تتعلق بالكسل والموبايل في ايدي ، قادتني الاقدار لان اشاهد اول ربع ساعة في مسلسل الفنان احمد العوضي ، و في الربع ساعة دي شوفت كل انواع الانتصارات و البطولات الي ممكن يحققها اعظم انسان في الحياة الدنيا علي كل المستويات الرياضية و المهنية و الاجتماعية و قصف الجبهات و فجأة حصلت مفاجأة غير متوقعة لما لقيت مرات العوضي بتعايره بعدم قدرته علي الانجاب و فضلت اتساءل و انا مذهول ازاي خزان رجولة و تيستيستيرون زي العوضي يوافق انه يطلع مبيخلفش في المسلسل ، و قعدت اتخيل سيناريوهات لتفسير تلك المعجزة العجيبة
. هل مثلا هنكتشف في الحلقات القادمة انه اتبرع بحيواناته المنوية لاحد المحتاجين و مسابش شوية لنفسه ؟ و لا هيقولوا انه خد طلقة في محاشمه في حرب اكتوبر بينما كان بيحطم خط بارليف المنيع و ده الي اتسبب في عجزه ؟ في الواقع كان ممكن يبقي فيه سيناريوهات اكثر ابداعا نعرف مثلا عن طريق الفلاش باك ان اعداءه استغلوا عشقه للرياضة منذ الصغر و كانوا بيحطوله زيت خروع في برطمانات الامينو ، او ان العجز ده جاله بسبب عمله المتكرر مع الفنان عصام السقا ، و ده في حد ذاته كفيل انه يقطع خلف اي شخص مهما بلغت درجة فحولته
و في وسط التفكير العميق ده ظهر الحق و طلع ان العوضي زي الفل و بيخلف عادي و صحته عال العال و العيب في مراته ، بس هو من فرط شهامته قالها ان العيب فيه عشان ميجرحهاش ، و من كتر فرحتي زحفت علي الارض لحد ما وصلت للريموت بصعوبة بالغة ، و طفيت التليفزيون و نمت بسرعة قبل ما افقد انا قدرتي علي الانجاب
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
