سألني صاحبي حبيتها؟ وف رموشك بنيت بيتها طب اتكلم وقول الكلمه.. حسيتها؟ بغير منك ومن بوحك واشيل همك وليل نوحك حروفك ف الهوى غنوة بغنيها بلون البحر تغزلها واحنيها وبستنى اشوف الرد ف عنيها الاقي الفرحه جايالاك وشايلالك حنين العمر ف ايديها انا زيك كمان مشتاق وغارق في بحور اشواق لكن هي بتشتاقلك ونسْياني تقربلك وعن احلامها بعداني منا المهزوم كدا ديماً وساكن جوا احزاني بعيش ف الضل وحداني بخاف م النور ليكشفني ويحبسني ف قمقم جوا عنواني يا صاحبي بغيير انا منك وفرحانلك لاني بحب اصحابي حاتسعدها عشان خاطري وخليها اميرة الكون ويمكن لما تسعدها اكون ممنون ما هو انت حنون وانا عارف ومطمن ومش خايف عزايا انها تفرح ولو وياك ويبكي قلبي من الحسرة وهيا معاك منا برده بموت فيها وعاشق صورتي ف عنيها حتى لو بقيت مظلوم وحافضل ف الهوى محروم حاكون شاكر وانا مهزوم محمود عبد الرحمن
