حزر فزر عندك حل. مسابقة الشعر العامى بقلم/ حمادة النخيلى من مصر

الاسم :احمد ربيع سليمان النخيلى
الشهرة :حماده النخيلى
البلد: مصر
شعر عامى

(( حزر فزر عندك حل ))

حَاجَة تْخَلِّى العَقل يْجِنْ

هُوَّ أَخُويا وِعَمِّ الوَادْ

وإبْنِى فى نَفْسِ الوقتِ دا خَالُهْ

ومْرَاتْ ابويا أُخْتُهْ عاد

ومْرَاتى بَقِتْ جِدَّه لَخُويا

ومْرَاتَ ابويا أُخْتِ الواد

وِوَلَدْها فى الأصلِ أخويا

وإبْنى لِجُوزْها وَلَدِ الواد

ومراتى بَقَتْ جِدَّه لَخُويا

وأبويا صَبَحْ جِدْ الواد

حاجة تْخَلِّى العقل يجِنْ

مين فيكم هايحِلَّها عاد

………………………………………….

الحل :
حاجة بسيطة وسهلة يا عم

رُحْتِ اتجوزت إِنتَ وبوك

إنتَ وَلَدُه أخدْتِ الأُمْ

وبِنْتها هَىَّ أخدها أبوك

وإبْنها لابنك أصبح عًمْ

وِكمان أصبح هوَّ أخوك

فزورة حلوة وخِفِة دَمْ

حاجة تِجَنن إنت وَبُوكْ

………………………………………….
حماده النخيلى