ط
مسابقة الشعر العامى

حكايتنا مع الايام .مسابقة شعر العامية بقلم / محمد ابو العبادى من مصر

. حكايتنا مع الايام ..
مبارح بكينا
اندلس راحت
وقلنا خلاص
الاقصى مبروك علينا
فيه نصلى
دا مسرى نبينا
هبت رياح م الغرب
والقمر كان خسوف
حاملة وياها رعد
زرعت فى الدنيا خوف
ضربت كل المكان
فرشت طريق من رمال
لزرع جديد
نبت من شيطان
فرد شراع الظلم
بعيون ماليها الغل
ضرب خنجره
فى العمق ضربة
غرس فاسه فى الاساس
كسر به الترباس
وحيطنا كان دا يخ
من الانا والفرقة
ما تحمل هوا
ولا جداره كانت صادة
وقدسنا تاه
فى الروحة والردة
واقصانا ضاع
والعيون كانت شاردة
قلنا نحافظ عا الباقى
اصل اللى بيروح
أمتى يوم ياجى
وبالمرة نحضر
الفرس والمهرة
ونربط ربطتنا
كمان ربطة
ونشد السرج للغزوة
ويومها نضرب الضربة
بيها نحرر الاقصى
وطالت الايام
وتاه بينا الزمان
بالدمع بكينا
وضاعت مراسينا
نفس الكلام قايلين
وف نفس المكان واقفين
لا روحنا ولا جينا
وتاهت الدنيا بينا
لا غزينا .. ولا جبنا
من القمر حتة
وسرقتنا الليالى
حالمين بنجم
فى السما عالى
ناكل نعاقر
نصلى الفرض بعد ما نتوضى
وف حر السموم نستغطى
نغط فى النوم كام غطة
نصبح نفوق نلاقى
الوطن نقص كمان حتة
حتة عزيزة
عاصمة رشيدة
كربلا ئك يا حسين
مسمار جديد
مصنوع من حديد
دقه عتل عتيد
شق الجسد كمان شقة
عزل الراس عن الجتة
وأحنا فينا سرحت العتة
غمضنا عيونا
دارينا كسوفنا
وغراب البين
وسطنا ييتحنجل
سكينه للوطن تقسم
وشموعه للعيون تزغلل
تجعل الاخ لاخوه يقتل
ومشينا الخطوة
وراه بسلاسة
وصار الجرح
فى القلب بالتلاتة
هل القمر والدنيا ضحكانة
جايب من الربيع زهرة
شايل غنوة وحكاية
عا القديم ندوس
ما احنا تعبنا منه بكفاية
قديمنا خلاص انتهى
شاخ وداخ
وزقانا الهم فى كباية
نفتح قلبنا .. نرسم حلمنا
ونبتدى من جديد الحكاية
وفرحنا والامل كاسينا
والضى مالى عنينا
ولميادين فسيحة جرينا
احلامنا سابقة لخطاوينا
وانشال الهم وانزاح
وقلنا الشجرة هتطرح تفاح
اتارى العفريت
فى العشة لابد
راكب راسه ومعاند
خالى الضمير والذمة
ناوى يهبط الهمة
عاوز قسمة المعابد
عاوز خراب المداين
اتارى الدنيا دوارة
ربيعنا صار شتانا
والغارة عتية وجبارة
زادت الاهة جوانا
وبين الاهة والتانية
امل مكسور
وسد لطاقة نور
وصوت مخنوق خايف
يعلن مين المسئول
وخيال غارق فى
ليل محسوم
باكى على امل بكرة
وفى لحظة تموت الفكرة
وتصير فى المدى ذكرى
وكأن ايامنا رفضانا
وحكم الزمان اضنانا
وهيفرق ايه بكرة عن مبارح
ما هو الوهن جوانا طارح
طارح غصون الغم
كاسر قلوع الحلم
وكأنه حجر داير
داير بينا فى الرحا
غايب مابينا الوفا
وبدل الجرح صار
مية جرح وجرح
وهل الهلال ياسيد
بركاتك لجل نعيد
ربيعنا طلع نكبة
وبدل الاندلس والاقصى
راحت بغداد وعدن
ليبيا وشام ويمن
وصرنا مية حتة وحتة
والموت غيم على بيوتنا
دم الحسين مسفوح
ناره بتلسعنا
ومريم البتول
دمعها المسكوب
جوانا يوجعنا
اه يا قلبنا الموجوع
اه يا حلمنا المكسور
صرنا نبكى على الايام
اللى جرى فيها واللى كان
نحلم بشجرة
خضرة وضليلة
لامة كل العيلة
تجمعنا الضحكة والدمعة
نتقاسم مابينا اللقمة
نعيش الامان من غير حدود
نلغى التأشيرة من الوجود
محمد حسن ابو العبادى

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى