رباعيات بالعامية – بقلم / اسلام أبوالحسن
—————————————————
(1)رباعية حرف
الحــــــرف ويـــــــا الحـــرف بـيـدور علـــيه
والكلمة جمب الكلمة بالمعنى تلاقيه
تلقى الحقيقة بين سطور اللي اتكتب
والــلي اتـكــــــــتـب هـــــوّه الــــلي بنخـبــيــه
عجبي…
********
(2) رباعية رمش
شاعر وباشْعِر ألف حرْف وحرْف
كلمات ونَـحْــو وألف قاعدة صــرْف
ويا عجبي فْ رموشك أنا اتحيّر
مقدرشي اعبّر عن جمال الطرْف
عجبي…
************
(3) رباعية تكنولوجيا
عَـالَم كبير ف التكنولوجيا خطير
صنّـــــع وبــــدّع كـــل يــــوم أساطـــــيـر
أد أمّــا شـــاف وعـــــرف وطـــوّر لــه
مقدرشي يوم يصنع لقلبه ضميــر
عجبي…
************
(4) رباعية صايع
يا شاب يا صايع مقندلها
تلعب بسمكة صايدها من ديلها
ذنب البنات دي أمانة ف رقبتك
بنتك ضناك هيه اللي ح تشيلها
عجبي…
************
(5) رباعية مضروب
ضربوني موت علشان بأقول الحق
وف كل ضربة القلب ينطق لأ
مش ح ارضى أسكتْ مهما اشوف الموت
ولو انْــفــطـــر قلب الجبـل واتشق
عجبي…
************
(6) رباعية عفريت
معجون انا ف حبَّــك ولا العفاريت
ترحَلْ تلاقيني معاك ف البيت
تنزل ف بحر ويبقى قلبي البحر
ولا يصرفه غير لو تقول حبيت
عجبي…
************
(7) رباعية مهموم
يا فرحة نسيني القسا والهم
تعبت دموعي وحزني ياما يغُــم
لو مُــت وياكي ح اعيش فرحان
وان عشت من غيرك ح اموت بالهم
عجبي…
************
(8) رباعية لسان
ياْ عجبي ياْ إنسان على طبْعَك
توعد وبحماسة يشيـْـر صَـبْــعَـك
على أد ما بتوعد ما بتنفذ
طب ليه الكلام.. هوّه اللسان وَجْـــعَــك؟
عجبي…
***********
(9) رباعية مغلوب
دنيا غـــريبة ولسه عايشــــــــنها
رغم المقآسي اللي احنا كارهنها
عايشين نعافر ساعات بنغلبها
اتــــــــاريها غالبـــانا ما غالبيــــــنها
عجبي…
***********
(10) رباعية ضمير
ضمير ومش ساكت على حقه
ولما يتكلم يقول صِــدقــه
كتير حاولوا يمــوتـــوا فيه
جبل.. ورغم صموده بيدقوا
عجبي…
***********
(11) رباعية بني الإنسان
شاعر وبتخيل بني الإنسان
طيبة وحُــب وْروح حـنـون وأمــان
قـــاعـــد وبتـــأمــلّي يــاْ عجـــبي
فــــيـــن كـــل ده مـنـك أيــا إنـســــــان
عجبي…
***********
(12) رباعية فيلسوف
طاير ومش طاير عشان انسان
سارح خيالي بس مش سرحان
ازايْ بتجمع فكرة ونقيضها
ما الفلسفة دايما كده يا زمان
عجبي…
**********
(13) رباعية عشاق
يا عجبي ع الدنيا وع العاشقين
دايبين سوى جوه حنان وحنين
على أد ما الدنيا بتديهم
على أد ما يقولوا كمان عايزين
عجبي…
