سيب نفسك ..قصيدة للشاعرة / هناء نوار

عمرك يوم جربت تكون
واحد تانى ..
غير نفسك اللى انت عارفها
تطلع من جلدك .. من جدرك
تقلع بدلة لابسها سنين
و تفك الكرافتة الرزلة ..
اللى بتخنق جواك أنفاسك
و تحسسك ان انت سجين
تلبس شورت ..
و تنزل تجرى على الكورنيش
خايف الناس لا يبصوا عليك ؟؟
طب فيها إيه ..
ما يبصوا عليك
همّ إن طالوا يعملوا زيك
كله ها يقلع و لا حا يهمه
إوعى الجُبن يعشش فيك
و اياك ترمى ودانك ليهم :
لا ما يصحش ..
لا كدا عيب
ركّب بوصلة فِ كعب الجزمة
و سيبها تحدد ليك خطاويك
طب جربت ف مرة تأجّر
مركب وحدك وسط البحر ..
و الأمواج عمالة تشيلك
تهبد فيك
و تخليك زى المجذوب
مانتش خايف
يكبس فجأة عليك النوم
و انت براحتك ..
فارد جسمك ..
أول مرة بتاخد نَفَسك
سايب نفسك كدا ع الآخر
ناسي هموم الدنيا بحالها
مش شاغلك
و لا قالقك حد
راسك متشعلقة فوق كتفك
و عنيك حتبُظّ على النجمة
الواقفة هناك
قاعد تغمزلها .. و الحلوة
سايقة التقل بجد عليك
مع إنها نِفسها تلمسها
أو تحضنها كمان بإديك
بص كويس
حاول تاخد منها معاد
قوم و اتعرّف على شفايفها
قبل ما غيرك ييجى يشوفها
و اهو بالمرة تسلم فيها
ع القمر السهران على بابك
و اللى سهرت ليالى كتير
بتاندى عليه ورا شباكك
و بتقراله قصايد الحب
اللى انت كاتبها
لدرجِة ..
كان كل اما بيسمع شِعرك ..
فجأة بيجِرى
يدارى كسوفُه وسط سحابة
و كإنه عامل عَملة كبيرة
و خايف منك
لحسن تفضحه جوة قصيدة
و تكشف سره
غمّض عينك .. و افتح قلبك
و بلاش تعمل زى الناس
جرب عيش نفس الإحساس
و ابعت روحك للى تحبه
و قوله ان انت عشقته بجد
و انك من جواك زى ما انت
و استنى اما يجيلك رد
عيش اللحظة و متّع نفسك
دوّر ع الحب .. تلقاه جنبك
إنت نضيف أوى من جواك
علشان كدا
حاتشوف الدنيا بلونها الوردى
و هى بترقص و بتضحكلك
شوف بقا كام واحد حيحبك
و يفكر يعمل كدا زيك
ملعون ابو كل الأحزان