….
صرخ القلم علَّم عَلام
علي الورق كتب غلط
أو حرف اكس
مش عاجبه ليه اللي انكتب
من الكلام
وايه السبب شفت العجب
والقلب من الحزن التهب
حتى القلم رفض الكتابة
زعلت يا قلمي زعلت يا قلمي
من الكلام اشتكيت
وقلت دي صفحة في غابة
كل الحروف فيها ديابة
مش هكتب مش هكتب
غير في صفحات الغلابة
دا الحزن فيها مضلل
علي الورق وكل الحروف
بكت نقط شافت كتير
شابت من الهم الكبير
لما الزمان داس عليها
اتغيرت
الغين بقت عين
والتاء بقت نون
في الصفحة دي كله جنون
قالوا اكتب لنا حُلوَك
وانسى مُرَّك
قلت أبداً والله ما خون
لكل حرف من القلم
بصدقي أصون
وأنا من غير قلم
وحروف نظيفة مش هكون
أخدوا القلم وسابوني بحيرة
وأنا نفسي اكتب للحلوة
أم الضفيرة
أنا العاشق وبموت عليكِ
من الهوا لو قالوا غيرة
بس أكتب بإيه مش لاقي
غير دمع العيون
العين جابت النون
ونقطت فيها الدموع
وبريشة حلوة صغيّرة
على ضوء شموع
كتبت صفحة مصرية قصيرة
مطحونة وانا الموجوع
عنوانهاينفع يبقى للزمان رجوع
خلصت دموعي
وأنا بشكي همي
ونفسي أكتب والله يا أمي
اكتب بإيه غير بدمي
واكتب بإيه اللي جوايا
وارسم بإيه أحلى ضحكاية
كتمولي فمي
قالوا لي اسكت خلاص
دا بكره أحلى
ومستني بكره يجي بخلاص
مش لاقي أحلى
طب سيبولي القلم
أرسم علم والنسر فيه
أكتب عليه الله أكبر
الله أكبر يمكن تحلى
كل الحروف قعدة هنا
وعارفة اني في وحله
اخدو القلم وسبوني وحديا
وانا لو غبت هتكتب لياليا
الاه هتوجع في القلم
قبل ما توجع فيا
علشان كدا صرخ القلم من الالم
ورفض الكلام وكتب غلط
وعلم علام
……………..
بقلم محمود فرج
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
