أمل كداب
………….
أمل كداب يدق الباب
ف نرتاحله و نفتح له
و نتفاجئ بحلم سراب
ف نرجع تاني م الأول
و جايز جرحنا يطول
و لسه الحلم برضو شباب
و عمره م غاب
بنيأس أيوا دا بنيأس
و بعد اليأس نتنفس
يشوقنا الأمل عالباب
يدق كتير و يتمني
يقابله الشوق و يحضنا
م يلقي تاني منا جواب
و يرجع تاني يستني
يعاكس قال و يشغلنا
و فاكر إن هنصدق
ما لو كان الأمل يعشق
م كانش ف مرة قفل الباب
و كان يفضل يغازلنا
ميجرحناش و يفهمنا
ميبقاش مرة يوم كداب
و لا تاني يدق الباب
الشاعر / محمد النمر
