قصيدة : سافر مع الأوجاع . مسابقة الشعر العامي بقلم / ابنتهال أحمد محمد الشربينى

قصيدة (سافر مع الاوجاع )

سافر مع الاوجاع

من غير سلام ووداع

هاجر بقلبه وراح

كاتم كلام وسماع !!

عاش الحياة مركون

قضى سكاته شجون

قالوا عليه مجنون

والعمر عدى ضياع !!

ملقاش ف حارته حبايب

لف الشوارع دايب

يمكن يلاقى صحايب

بعيون جفونها وساع !!

دار بالخطاوى ولف

يضرب له كف بكف

فاق م الجراح كده قام

والدمع فجأة جف !!

استقوى بربه وقام

سابه من الأوهام

قام يبنى فى الاحلام

سف السلايم سف

حس بحنين وآهات

وكلام ده زى سكات

ضربت ساعات دقات

والعين ماشبعت رف !!